Í hesum partinum kanst tú uppliva ymisk verk, ið hava grót sum myndevni. Grót í ymsum líki: tøvt og bleytt grót úr føroyskari ull, málningar av og við gróti í landslagnum, og tær eyðkendu svartflekkutu grótrúgvurnar við Kirkjubøreyn. Hevur tú lagt til merkis, at føroyska grótið ofta hevur nógvar litblettir í bæði gulum, grønum, bláum og svørtum litbrigdum? Føroysku søgurnar, sagnirnar og mýturnar eru eisini fyltar við frásagnum um trøll, kellingar, huldufólk og lív teirra í náttúruni. Best man vera at spyrja steinarnar, áðrenn tú setur teg á teir, um nú onkur skuldi búð í teimum.