Poddvarp um íblásturin, ið føroysk listafólk fáa úr havinum

Í Føroyum er brúsandi havið altíð hjástatt, og tað er ein týdningarmikil kelda til íblástur. Í poddvarpsrøðini ”Havsins listafólk”, sum Listasavn Føroya stendur fyri, ber til at hoyra hesi listafólk; Randi Samsonsen, Trónd Patursson og Jónu Rasmussen.

Fyrsti partur í røðini er um listaverkið ‘’Plastic Dialogue’’ eftir listakvinnuna Randi Samsonsen. Tá hon var stødd í Norðurnoregi, gjørdist hon bilsin av øllum ruskinum og plastinum, sum skolaði inn á land. Við at savna inn millum annað plasthandskar vísir Randi Samsonsen okkum á menniskjans nýtslumentan: Vit hava evnað plasttilfar, sum tekur ótrúliga nógv ár hjá náttúruni at niðurbróta.

Hetta er fyrstu ferð, at Listasavnið útgevur eitt poddvarp. Poddvarpið varð gjørt sum eitt ískoyti til serframsýningina ”Havið”, sum kundi upplivast á Listasavninum 6. november 2020 - 5. apríl 2021.

Hoppa við umborð og lurta eftir fantastiskum frásøgum frá føroyskum listafólki.  

Journalistur og lagt til rættis: Rikke Mia Skovdal frá Listasavni Føroya

Húsi: Kirstin Helgadóttir  

Stuðul: Dansk-Færøsk Kulturfond (poddvarpið er á donskum)

Samband: info@art.fo, tlf: +298 313579