Í rúminum Havið kanst tú uppliva listaverk, sum snúgva seg um havið. Tær átjan oyggjarnar eru kringsettar av dunandi sjógvi – her avmyndað í alskyns bláum litbrigdum. Havið er stórt, djúpt og vandamikið, samstundis sum, at tað er Føroya størsta inntøkukelda og arbeiðspláss. Listaverkini í rúminum vísa, hvussu listafólkini leggja dent á vandan og álvarsemið, og hvussu bátarnir avmyndast bæði í góðum veðri og illveðri. Sært tú mannin, sum er á veg heim við fiski? Og fiskur, sum er hongdur upp at turka uttanfyri eitt hús?